L Cunsëi Furmazion de S. Cristina nvieia ala prejentazion de fotografies fates da Gottfried Insam da Cësanueva, n mierculdi ai 2 de utober dala 20:00 tla sala de Chemun a S. Cristina. L unirà nce mustrà films de testemunianzes de ëi de Gherdéina, che à metù sù n lift dai schi.
La fotografies: Gottfried Insam da Cësanueva (1914-2004) à laurà coche fotograf dal 1937 nchin al 1947, nchin che l ie emigrà tl’Argentina. Dut l material da fotograf, danter chësc truepa de pitla scatules cun negatifs de scipa, ie restà te na majon tl sotët de Cësanueva.
Sun la lastes iel da udëi retrac de persones de Gherdëina, de uni età. Gran pert dla lastes à scrit su l inuem y cuinuem dla persona fotografeda o l inuem dla cësa o dl luech. Pra d’autres mancia chësta descrizions y perchël vëniel metù a ji na sëira dedicheda aposta a chësta fotografies, per damandé aiut dala populazion, per identifiché la persones sun la pultredes.
I films: de plu ëi che à laurà pea zacan, per mëter su i lifc dai schi, cunterà de ciunes che fova la ndesfides da ntlëuta; coche i straciova, sun cie che i messova cialé y coche i metova i furesc che univa a ji cun i schi, a ti judé a fé ji dut cant. I ne n cunterà de blotes y de strambes.
Ntan la sëira puderan scuté su a chësta testemunianzes dal vif, sambén nce fajan dumandes.
